Haukur Arnþórsson stjórnsýslufræðingur flytur.

Í fyrirlestrinum er farið yfir nýjar rannsóknarniðurstöður um samanburð lesmiðla og áhrif snjalltækja á lestur og einbeitingu og m.a. minnst á niðurstöður rannsókna bandarísku prófessoranna Naomi Baron frá 2015 og alveg nýjar rannsóknir Maryanne Wolf, sem vakið hafa mikla athygli.

Þá verður kynnt niðurstaða rannsóknar um stöðu þessara lesmiðla hér á landi, sem framkvæmd var af Félagsvísindastofnun HÍ og Haukur vann úr og birti grein um í vorhefti Skírnis 2018. Rannsóknin var framlag Íslands til evrópska verkefnisins e-read og styrkt af Innanríkisráðuneytinu og Menntamálaráðuneytinu. Niðurstöður hennar sýna hversu mikið er lesið af hvorum miðli af ólíku lesefni og tengja lestur aldri, kyni og fleiri lýðfræðilegum breytum og gefa skemmtilega innsýn í yfirstandandi þróun.

Dr. Haukur Arnþórsson, stjórnsýslufræðingur, er sjálfstætt starfandi fræðimaður við ReykjavíkurAkademíuna. Hann átti áður aldarfjórðungs feril í upplýsingatæknigeiranum og rannsakar ekki síst samfélagsleg áhrif upplýsingatækni. Hann hefur verið virkur í rannsóknarstarfsemi á vegum ESB og er nú nýkomin af viðamikilli ráðstefnu á vegum e-read verkefnisins, sem einmitt fjallaði um lestur og snjalltæki.

Kaffiveitingar og umræður. Aðgangur kr. 500.

Verið öll velkomin.

Myndasafn