Laugardaginn 21. september var haldinn hátíðlegur Dagur Snorra Sturlusonar

Þema dagsins var  var „Snorri og ritmenning íslenskra miðalda“.  Reiknað er með að halda árlega upp á Dag Snorra í kringum ártíð hans, 23. september en þetta var í fyrsta sinn sem haldið var upp á daginn með þessu sniði. Að dagskrárhaldi komu fjölmargir aðiljar, bæði innlendir og erlendir, og var dagskráin allvel sótt.

 Góðir gestir – nýsköpun í miðlun 

Í tilefni dagsins var einnig boðið upp á borðspilaviðburð í Finnsstofu inn af sýningarsal Snorrastofu, sem hófst kl. 13. Viðburðurinn heppnaðist vel og var setið við tvö borð, annað með stríðsleik undir stjórn James Holloway, sem byggðist á Haraldar sögu harðráða eftir Snorra, en hitt með hlutverkaleik byggðum á forníslenskum sögum, sem Pedro Ziviani stjórnaði. Þessi þáttur dagsins var haldinn í samvinnu við Game Lab við Edinborgarháskóla.

Í hátíðardagskránni síðar um daginn, var boðið upp á kynningu á væntanlegri gerð líkans af bæ Snorra og hlutverki leikja við miðlun miðaldasögunnar. Eftirfarandi erlendir gestir hátíðarinnar sáu um kynninguna: Sagnfræðingurinn Gianluca Raccagni, dósent við Edinborgarháskóla, James Holloway, leikjahönnuður frá Cambridge, Federico Mammarella, forstöðumaður upplýsingamiðstöðvar ferðamanna og safnstjóri kastalans í Gradara á Ítalíu, og Pedro Ziviani, Brasilíumaður búsettur í Reykjavík.

 Ráðherra menningarmála styður Snorrastofu

Hin formlega dagskrá hófst kl.16  með setningarávarpi Lilju D. Alfreðsdóttur, ráðherra menningarmála, sem Arna Kristín Einarsdóttir, skrifstofustjóri í menningarráðuneytinu flutti fyrir hennar hönd. Í máli hennar kom skýrt fram afdráttarlaus stuðningur ráðuneytisins við starf Snorrastofu, ekki síst fræðslu- og útbreiðsluþætti starfseminnar. Í því samhengi kynni nýstárleg miðlun sögunnar með borðspilum að vera vænleg til að kveikja áhuga ungmenna á sögu lands og þjóðar.

 Ritmenning íslenskra miðalda

Bergur Þorgeirsson, forstöðumaður lýsti starfsemi Snorrastofu í erindi sínu „Snorri í Istanbúl“. Í kjölfarið komu síðan sérlega áhugaverð erindi á fræðasviðinu, erindi Óskars Guðmundssonar, „Snorraskólinn“, Guðrúnar Nordals, „Rannsóknir á ritmenningu íslenskra miðalda“, Gottskálks Þórs Jenssonar, „Ritmenningin á Þingeyrum í ljósi fornleifanna“ og Torfa H. Tulinius, „Kristin nýgerving í heiðnu kvæði. Um Sonatorrek í Egils sögu.“. Haft var á orði að hér hefði áheyrendum gefist kostur á að skyggnast inn i áhugaverðar rannsóknir, umræðu og tilgátur á sviði norrænna fræða.

Dagskrárstjórn annaðist séra Geir Waage. Félagar úr Reykholtskórnum fluttu nokkur lög undir stjórn Hólmfríðar Friðjónsdóttur. En samkomunni sleit Þorgeir Ólafsson, formaður stjórnar Snorrastofu

Myndasafn