Guðmundur G. Hagalín og bandarískar nútíðarbókmenntir

Fyrirlestrar í héraði

Guðmundur G. Hagalín

Guðmundur G. Hagalín

Haukur Ingvarsson bókmenntafræðingur flytur

Hinn eftirminnilegi og litríki rithöfundur, Guðmundur G. Hagalín (1898-1985), bjó um 20 ára skeið á Mýrum í Reykholtsdal og auðgaði samfélag sitt hér á margvíslegan hátt ásamt konu sinni Unni Aradóttur.

Þau hvíla bæði í kirkjugarðinum í Reykholti, en Snorrastofa varðveitir bókasafn þeirra, sem þau gáfu af miklum rausnarskap þegar stofnunin var enn óskrifað blað.  Stofuhúsgögn þeirra prýða gestaíbúð Snorrastofu, sem leigð er út til fræði- og listamanna og gefa henni virðulegan og hlýlegan blæ, sem einkenndi jafnan heimilið á Mýrum.

Guðmundur bjó á Ísafirði 1928-1945 þar sem hann starfaði að blaðaútgáfu og bókavörslu, auk þess að stunda ritstörf sín og taka virkan þátt í samfélaginu, ekki síst á pólitískum vettvandi.

Í fyrirlestrinum fjallar Haukur Ingvarsson um uppbyggingu bókasafnsins á Ísafirði sem hluta af menningarstefnu stjórnvalda á þriðja og fjórða áratugnum. Skoðað verður sérstaklega hvernig Guðmundur G. Hagalín rækti starf sitt sem bókavörður og hvernig áhugasvið hans sjálfs setti svip sinn á starfssemina. Að lokum verða áhrifin skoðuð með sérstakri áherslu á Guðmund Daníelsson sem nýtti sér safnið meðan hann starfaði sem kennari á Suðureyri við Súgandafjörð undir lok fjórða áratugarins og í upphafi þess fimmta.

 

HaukurIngvarsson2011EBM

Haukur Ingvarsson

Haukur Ingvarsson er fæddur 12. febrúar 1979. Hann lauk meistaraprófi í íslenskum bókmenntum árið 2005 og hefur síðan fengist við ritstörf og dagskrárgerð í útvarpi. Haukur kom fyrst fram sem ljóðskáld og tók m.a. þátt í ýmsum uppákomum á vegum Nýhils áður en fyrsta ljóðabók hans, Niðurfall og þættir af hinum dularfulla Manga, leit dagsins ljós árið 2004. Hann hefur síðan sent frá sér fræðibókina Andlitsdrættir samtíðarinnar: Síðustu skáldsögur Halldórs Laxness (2009) og skáldsöguna Nóvember 1976 (2011). Þá hefur hann birt ljóð, þýðingar og greinar í bókum og tímaritum. Haukur leggur nú stund á doktorsnám í íslenskum bókmenntum við Háskóla Íslands. Efni rannsóknarinnar er William Faulkner á Íslandi.

Fyrirlesturinn hefst að vanda kl. 20:30 og boðið verður til kaffiveitinga og umræðna. Aðgangur er 500 krónur.

 

 

Væntanlegir viðburðir